«2023 жылды сенімен қарсы алатыныма қуаныштымын, көккөзім!». Әнші әрі блогер Фариза Ескермес жаңа жылда оқырмандарын сүйіктісімен таныстырып, «онлайн беташар» жасаған еді. «Джейран» тобының экс-мүшесі ғашығын «көккөзім» деп атауы да бекер емес. Себебі, Фариза көңіл қосқан жанның ұлты — орыс. Ал Ескермес-тегі қазақ қызы. Бүгінде фолловерлер әдемі жұптың үлкен тойын күтіп жүр.
Луинаның да өмірлік серігі өзге ұлт өкілі. Әнші 2019 жылы Артем Обуховпен некесін қиған еді. Артемде орыс, украин және еврей халықтарының қаны бар. Луина тіпті инстаграм парақшасында күйеуінің 16 жасында Ислам дінін қабылдаған мұсылман екенін айтып оқырмандарын таңқалдырған-ды. Жұп бүгінде 6 жастағы Давид есімді ұл тәрбиелеп отыр.
«Мен тамырында бірнеше ұлттың қаны бар жанға ғашық болдым!», — дәл осылай күйеуі жайлы оқырмандарына айтқан Мақпал Исабекованың да отбасы әр түрлі ұлт өкілдерінен тұрады. Әнші осы күнге дейін күйеуінің жүзі мен аты-жөнін жасырса да, инстаграм stories-ында ұлтын айтып қалған еді. Өнер иесі өмірлік серігі етіп таңдаған жан – еврей екенін мәлімдеді. Ал, Мақпалдың әкесі қазақ, ал анасы ұйғыр.
Қаны орыс ұлтынан болса да, жүрегі қазақ деп соғып тұрған әлемге әйгілі боксшы Генадий Головкинның жары қазақ қызы. Спортшы 2007 жылы Қарағандының тумасы Алина есімді аруға үйленген еді. Генаның тойы орыс халқының салт-дәстүрімен өтті. Ал жұп 2000 жылы танысып бір-бірін ұнатып қалған. Бүгінде GGG мен Алина ұлымен АҚШ-та тұрады.
Актер әрі каскадер Ерден Телемисовтың жұбайы Наталья Телемисова орыс ұлтының қызы. Nomad Stunts кәсіби каскадерлар ұжымының мүшесі жарымен Дария, Алиса, Медея есімді үш қыз тәрбиелеп отыр. Жұп 25 жылдан астам бірге өткізіп жатқан отбасылық өмірлерін әлеуметтік желілерде белсенді түрде бөлісіп отырады.
КВН жұлдызы, сценарист Құмар Лұқмановтың отбасы бірнеше ұлт өкілінен тұрады. Актердің жары Гузель ұйғыр қызы. Көпшілікке үлгі көрсетіп жүрген жұптың бүгінде 5 бірдей баласы бар. Ең кенжесі Мирас Құмарұлы 2022 жылы сәуір айында дүниеге келді.
Ресейде кеңінен танылған кинорежиссер Тимур Бекмамбетовтың жұбайы Наталия Фишман орыс халқының қызы. Бүгінде Татарстан президентінің көмекшісі қызметін атқаратын Наталья Тимурға 2019 жылы тұрмысқа шықты.
«Қай ұлт болса да ең бастысы шынайы махаббат болса, қалғаны маңызды емес», — дейді жұлдызды отбасылар.
Автор. Harper’s BAZAAR Kazakhstan. Фото. Instagram
