Халықаралық әйелдер күні – әрдайым көктемнің басталуын «ашатын» алғашқы мереке. Ауа райы әзірге өзгеріп, бізді жылы күндермен қуанта қоймағанымен, бұл еш кедергі емес. Жылы лебіздер, жақындарыңызбен бірге өткізетін мерекелік кездесулер және өзекті сыйлықтар жанды кем дегенде сондай жылытады. Осы орайда Harper’s BAZAAR Kazakhstan сіздерге көктемгі көңіл күй сыйлайтын 8 наурызға арналған сыйлықтар топтамасын ұсынады. Бұл сыйлықтарды жақындарыңызға да, өзіңізге де тарту ете аласыз. Біздің гид сізге уақыт үнемдеуге көмектеседі, өйткені мерекеге дейін көп уақыт қалған жоқ.

Фото. Shutterstock. Автор. G.Mallofret және брендтің баспасөз қызметі

Zielinski & Rozen хош иісі

Бренд командасы бізді тағы да шырынды әрі жарқын жаңалығымен қуантты. Шафран, грейпфрут, элеми және темекі ноталары батыл композиция құрап, образға ерекше тартымдылық пен әсерлілік сыйлайды.

Saltanat Diamond Gallery брошь

Гүлдерді дизайнерлер сияқты ерекше жақсы көретін жандарға арналған нәзік әрі әсерлі сый. Қымбат тастармен көмкерілген мұндай қызғалдақ ешқашан солмайды және ұзақ жылдар бойы ең маңызды сәттерді еске салып тұрады.

Alaïa балеткалары

Егер сіз әпкеңіздің, анаңыздың, жақын құрбыңыздың, тәтеңіздің немесе әжеңіздің талғамын жақсы білсеңіз, батыл сыйлық таңдаудан қорықпаңыз. Анималистік принттер әлі де трендте, сондықтан таңдауыңызбен қателесіп қаламын деп алаңдамасаңыз болады.

Chanel көз бояуы

Мереке қарсаңында Chanel брендінің жарқыраған «деним» стиліндегі макияж топтамасы жарық көрді. Оның құрамына әрқайсымызға өзіміздің жаңа қырларымызды ашуға мүмкіндік беретін ерекше көз бояуы палеткалары енген.

Bvlgari сырғалары

Bvlgari бізге жақын жандарымызға махаббатымызды ерекше әсем түрде білдіруге мүмкіндік береді. Divas' Dream культтік топтамасындағы сырғалар уақытқа бағынбайтын әсемдігімен және әсерлілігімен ерекшеленеді. Сонымен қатар олар әйелдердің күшін, сұлулығы мен стилін дәріптейді.

Christian Louboutin сөмкесі

Сөмкелердің ең тренд пішіндерінің бірі — East West — әлі де өз позициясын жоғалтпай келеді. Модаға жақын жандар оны кең пішіні мен ойнақы силуэті үшін ерекше жақсы көреді. Ал Christian Louboutin ұсынған жарқын модель көптің назарын өзіне аударатыны сөзсіз.

Sisley тазартқыш муссы

Дұрыс күтім құралын таңдау кейде оңай бола бермейді. Алайда пион сығындысы бар тазартқыш мусс көпшілікке жарайды. Ол беттегі макияж қалдықтары мен түрлі ластануларды нәзік түрде тазартып, теріні күтімнің келесі кезеңіне дайындайды.

Cult Gaia алқасы

Ең көктемгі әшекейлердің бірін бізге Cult Gaia ұсынды. Мойынға нәзік оралған калла гүлі (зантедеския) бұл маусымда топтармен, кардигандармен және блузалармен үйлескенде өте әсерлі әрі романтикалық көрінеді.

Esternar ыдыстары

Түпнұсқа әрі аутентикалық ыдыстарды ұнататын жандарға қазақстандық Esternar маркасының бұйымдары ерекше ұнайды. PIALA топтамасы жергілікті дәстүрлер мен заманауи дизайнды бағалайтындардың арасында қазірдің өзінде танымал болып үлгерді.

Louis Vuitton кардхолдері

Шағын ғана сый да біреу үшін қастерлі қамқорлық белгісіне айналуы мүмкін. Оның үстіне француз сән үйінің нәзік лаванда реңкті кардхолдері ешкімді бейжай қалдырмайды.

Guerlain ерін далабы қапшығы

Сүйікті әріптесіңіз не құрбыңыз Guerlain ерін далабын қолданатынын білсеңіз, оған стильді қап сыйлаңыз. Мұндай сыйды игі көктемгі дәстүрге айналдыруға болады. Неге болмасын?

MAISON de SABRÉ телефон қапшығы

Әрине, мұндай телефон қаптары әлдеқашан таныс нәрсе. Дегенмен қолын бос ұстағысы келетін іскер әйелдер үшін, мысалы, кеңседе, ол айрықша пайдалы болуы мүмкін. Фуксияның әсем реңіндегі пайдалы сыйлық.

Shanghai Tang пижамасы

Ципао стиліндегі аутентті пижама әдемі үй киімін таңдайтын ең талғампаз жанкүйерлердің де көңілінен шығады. Бұған қоса, біреулер креатив танытып, оны күнделікті де киіп жүрер.

Tiffany & Co. көзілдірігі

Біз бірнеше мәрте айтқанбыз: 2026 жылы мүйіз жақтаулар «жалаңаш» үлгілерге орын береді. Мұндай аксессуарлар батыл да өзекті көрінеді, күннің күйдіргіш сәулесінен көзді қорғайды әрі образдарға жұмбақ реңк қосады.

Автор. Мария Бурлака. Аударған. Гүлдана Мұқан.

8 наурызға орай сіздер үшін көктемгі көңіл күй сыйлайтын керемет сыйлықтар жинадық