Маусым айы қазақстандық кино сүйер қауым үшін қызықты жаңалықтарға толы болмақ. Бұл жолы үлкен экранға бір-біріне мүлде ұқсамайтын екі фильм шығады: бірі — көрерменді жұмбақ оқиғалар әлеміне жетелейтін мистикалық триллер, екіншісі — күлкі мен шытырманға толы отбасылық хикая.
«Күн батыстан шыққанда», 11 маусым
11 маусымнан бастап кинотеатрларда режиссер Олжас Ибраевтың «Күн батыстан шыққанда» фильмі көрсетіле бастайды. Мистикалық триллер жанрындағы туынды көрерменді белгісіздік пен қорқынышқа толы оқиғалар әлеміне жетелейді.
Фильмде басты
рөлдерді Олжас Тоғымбет, Салтанат Құдайберген, Рузия Әбилаз, Абылай Сәлімханов,
Димаш Жыбырлақ және Сара Қабдрашитова сомдаған. Қараңғы атмосфера мен
шиеленісті сюжет отандық триллер жанрының жанкүйерлеріне ерекше әсер сыйламақ.
«Бишарашки в Индии»,
25 маусым
25 маусым күні көрерменге «Бишарашки в Индии» комедиялық фильмі жол тартады. Бұл жолы Байтемір әулетінің қызықты оқиғалары Қазақстаннан тыс жерде жалғасады.
Отбасылық бас қосу кезінде Әділетке Үндістаннан жұмбақ сәлемдеме келеді. Оның сырын туған анасымен байланыстырып, шындықтың түбіне жетуді көздеген кейіпкер отбасын демалысқа шығамыз деп көндіріп, Үндістанға аттанады. Алайда оларды күтпеген сынақтар, қауіпті жағдайлар және өмірлерін өзгертуі мүмкін құпиялар күтіп тұр. Фильмде Еркебұлан Тоқтар, Жан Байжанбаев, Асель Сағатова және Ару Сайранбаева басты рөлдерді сомдаған.
Маусым айындағы бұл екі премьера әртүрлі жанрдағы киноны ұнататын көрермендерге арналған. Бірі құпия мен мистиканы ұсынса, екіншісі отбасылық құндылықтар мен көңілді шытырман оқиғаларды алдыңғы орынға шығарады.
