Наурыз мерекесі қарсаңында, жыл сайын 18 наурыз елімізде ерекше мәнге ие – Ұлттық киім күні аталып өтеді. Бұл күн – халқымыздың төл мәдениетін, ұлттық рухын, сәндік өнерін дәріптейтін маңызды мереке. Ұлттық киім – қазақ халқының өмір салты, дүниетанымы мен талғамын айшықтайтын құндылық. Қазақы киімнің кестесіне, ою-өрнегіне, түстік үйлесіміне қарап, сол заманның өмір салты мен эстетикасын тануға болады.
Салт-дәстүрдің айнасы
Фото. Shutterstock. Автор. Syed Fahad Hussain Shah
Ұлттық киім күні – ата-бабалар мұрасын бүгінгі ұрпаққа жеткізудің, насихаттаудың, әрі жастарды тарихи болмысқа жақындатудың тамаша жолы. Ұлттық киімдеріміз – шеберліктің, сән-салтанаттың, ұрпақ сабақтастығының көрінісі. Ерлер киімі мен әйелдер киімі өз ерекшелігімен, өрнегімен, түстік үйлесімімен және тігіс мәнерімен дараланады. Қазақтың шапаны, камзолы, сәукелесі мен тақиясы, кестеленген көйлегі мен мәсісі – әрқайсысы ғасырлар қойнауынан жеткен өнер туындысы. Игі дәстүр – ұрпаққа тамыры тереңде жатқан тарихты сезінуге мүмкіндік береді. Тек мерекеде емес, күнделікті өмірде кию – нағыз рухани жаңғыру. Ол ұлтқа деген сүйіспеншілікті, ата-бабаның аманатына адалдықты білдіреді. Ұлттық киім күні – қазақы рух пен сәннің үндестігін көрсетер, ұлы мұраға деген құрметті арттырар маңызды күн.
Ұлттың киімін кию – рухани жаңғырудың айғағы
Фото. Shutterstock. Автор. Alexey_Arz
Ұлттық киімді мақтанышпен кию – отаншылдықтың белгісі. Өз ұлтыңа, тіліңе, салтыңа құрметпен қараудың, өз еліңмен мақтанудың көрінісі. Бүгінгі заманда жаһандану үдерісі күшейген сайын, өз мәдениетін сақтау маңызды бола түсуде. Ұлттық киім күні – жас ұрпаққа өнерді танытып, өз салт-дәстүрін құрметтеуге баулитын тәрбиелік мәні зор күн. Аталмыз мереке тек киім туралы күн емес, ол – ұлттық сана, рух, мәдениет, тарих туралы күн. Бұл – кім екенімізді ұмытпай, болмысымызды бағалау, ұлтымызбен мақтану күні.
Бүгінде ұлттық киім тек салт-жоралғыда ғана емес, заманауи үлгілермен күнделікті сәнге еніп келеді. Ұлттық стиль – ұлттың болмысы. Ал сол болмысты ұлықтау – әр қазақтың парызы, рухани жаңғырудың айғағы.
Автор. Қорлан Тұрсынбекова. Источник заглавного фото. Shutterstock. Автор. Vladimir Konstantinov
