Тері күтіміне келгенде, бұл мәселеге ерекше мұқият қарау қажет. Күннен қорғайтын крем жағу керектігін бәріміз білеміз. Бірақ теріге зиян келтіретін әрекеттер жайлы бәріміз бірдей хабардар емеспіз. Ендеше, осы олқылықтың орнын толтырайық. Дәл осы мақалада тері күтімінде жиі кездесетін, бірақ аулақ болу керек қателіктер тізімі.
Бетке жиі май жағу
Маймен макияжды немесе кірді кетіру идеясы тартымды көрінуі мүмкін. Дегенмен, дерматологтардың айтуынша, бұл әдет безеудің пайда болуына әкелуі мүмкін.
Бетке алма сірке суын жағу
Тері күтіміне қатысты ең үлкен қателіктің бірі – «табиғи заттар әрқашан пайдалы» деген қате түсінік. Шын мәнінде, кейбір табиғи ингредиенттер химиялық заттардан да қауіпті болуы мүмкін. Мысалы, алма сірке суы. Кейбіреулер оны теріні серпінді әрі жарқырағандай ету үшін қолдануға болатынын айтады. Алайда дерматологтар бұл зат қорғаныс қабатын бұзып, қызару мен тітіркенуге себеп болады дейді.
Косметолог таңдауда немқұрайлық таныту
Косметологқа бармас бұрын, оның сертификаттары мен кәсіби тәжірибесін мұқият зерттеңіз.
Безеуді қысып шығару
Бетте кенеттен безеу пайда болса, оны қысып шығарғыңыз келуі мүмкін. Бірақ бұл әрекет теріңізге одан да көп зиян келтіруі мүмкін: тыртықтар мен қабынуға әкеп соғады.
Әлеуметтік желідегі кеңестерге сену
Тіпті ең танымал бьюти-блогерлер мен TikTok кеңесшілері де қателесуі мүмкін. Олар сіздің теріңіздің ерекшеліктерін білмейді. Сондықтан әлеуметтік желідегі кеңестерге соқыр сенім артуға болмайды. Жеке тері ерекшеліктеріңізге сай емді тек маман ғана тағайындай алады.
Бірнеше күтім құралдарын қатар қолдану
Бет терісінің жарқырауы үшін ондаған күтім құралы қажет емес. Бұл жерде де киім гардеробы секілді, тек өзіңізге сай келетін негізгі өнімдер жиынтығы жеткілікті.
Бетті қатты ысқылау
Егер сіз теріні щеткамен немесе скрабпен механикалық жол арқылы тазартып үйренген болсаңыз, абай болыңыз. Бетті қатты ысқылау теріні зақымдауы мүмкін. Нәзік күтім – басты қағида.
Insider ұсынған мақаланың түпнұсқасын мына сілтеме арқылы оқи аласыз.
Автор. Harper’s BAZAAR Kazakhstan. Аударған. Қорлан Тұрсынбекова. Фото. Pexels. Unsplash. Shutterstock.
