Киномандар үшін сәуір айы түрлі жанрдағы репертуарға толы болмақ. Әсіресе, отандық прокатта көптен күткен туындылар жарық көріп, көрермен назарына ұсынылады. Олай болса, попкорн әзірлейтін сәт келген сияқты.
«Азартник». Премьера 3-сәуір
Түркия мен Қазақстанда таспаланған «Азартник» фильмі алғашында YouTube платформасына арналған веб-сериал ретінде шыққан. Миллиондаған қаралым жинап, көрерменнің көзайымына айналған жоба осылайша толықметрлі фильмге ұласты. Лента жеңіл ақшаға құныққан лудомандар жайлы. Премьера – 3 сәуір.
«Все на мослы: Битва поколений». Премьера 10-сәуір
«Все на мослы: Битва поколений» – отандық киногерлер ұсынған фэнтези жанрындағы толықметражды фильм. Каст құрамында Еркен Губашев, Ерболат Әлқожа, Марат Амираев, Құмар Лұқманов, Марат Әлібаев, Гүлнәр Силбаева, Ерлан Пірімбетов және Арнат Өтепбергенов сынды танымал жұлдыздар бар. Сюжет желісі бойынша ұрпақтар шайқасы орын алмақ. Ал басты реквизит – асық. Туынды 10 сәуірден бастап кинотеатрларда.
«Патруль. Последний приказ». Премьера 10-сәуір
10 жылдық тарихы бар «Патруль» жобасы биыл толықметражды фильм ретінде ұсынылмақ. «Патруль. Последний приказ» картинасы жетінші маусымның нүктесін қояды. Фильмде Imanbek, Динара Сатжан, Санжар Мәди, Жандос Айбасов, Асан Мажит, Әбунасыр және Әбілмансұр Серіковтер бой көрсетеді. Сондай-ақ, хэдлайнер ретінде ресейлік «Что было дальше?» мега жобасының резиденті Тамби Масаев арнайы шақырылған. Тұсаукесер – 10 сәуір.
«Мафия». Премьера 17-сәуір
Кім мафия? Бұл сұрақтың жауабын «Мафия» фильмінен таба аласыз. Әнші Серік Ибрагимовтің кинопродюсер ретінде ұсынған екінші толықметражды фильмі 17 сәуірден бастап үлкен экранға жол тартады. Шытырманға толы экшн-комедияда «ZamanBACK» фильмінің актерлік құрамын көре аласыз.
«Жабайы». Премьера 17-сәуір
«Qazaqfilm» 17 сәуірден бастап «Жабайы» атты драма ұсынады. Әсерлі оқиға әзілге, жылулыққа және достық, қабылдау мен бақыт үшін күрес туралы маңызды сабақтарға толы.
«ГӘП». Премьера 24-сәуір
Бұл фильмде бір «ГӘП» бар! Дәл осы ұранмен көрерменге ұсынылатын туынды Камбоджа елінде таспаланған. Фильмде Қанат Әлжаппар, Берік Айтжанов, Құралай Анарбекова, Әбілмансұр Серіков, Әсел Асқар, Шерхан Пірназар бой көрсетеді. Комедия 24 сәуірден бастап үлкен экранда.
«90+1». Премьера 24-сәуір
«90+1» – футбол тақырыбын арқау еткен алғашқы қазақстандық спорттық драма. Көрерменге мотивация сыйлайтын аталмыш картина 24 сәуірден бастап Қазақстанның барлық кинотеатрларында көрсетіледі.
Автор. Гүлдана Мұқан. Источник заглавного фото. Instagram. @gap_film_cambodia
