Қазіргі таңда ылғалдандыру жайлы сөз қозғалса, көбіне гиалурон қышқылы мен сквалан еске түседі. Ал глицерин секілді ұзақ жылдар бойы косметикалық өнімдердің құрамында болған компонент жайлы көбіміз ұмытып кеткенбіз. Шын мәнінде, бұл зат алғаш рет 1779 жылы швед химигі К. В. Шееле ашқан синтетикалық қосылыс (глицерол деп аталады) және содан бері ол көптеген салада кеңінен қолданыла бастады. Бүгінде түсі мен иісі жоқ бұл молекула тек косметологияда ғана емес, тағамдық қоспалар өндірісінде де пайдаланылады.
Глицерин деген не?
Глицерин, әдетте, өсімдік (соя, кокос, пальма майы) немесе жануар майларынан алынады. Сонымен қатар, оны жасанды жолмен де синтездеуге болады. Глицерол — мұнай өнімдерінің туындысы болғанымен, адам ағзасына қауіпсіз. Табиғи түрі тұрақты деп саналса да, бьюти индустриясында жиі қолданылатыны — дәл осы синтетикалық нұсқасы.
Адам ағзасы да өздігінен глицерин бөліп шығарады. Ол жасуша құрылымында маңызды рөл атқарып, ылғалды ұстап тұруға және терінің қорғаныс қабатын қалпына келтіруге көмектеседі.
Фото. Shutterstock. Автор. Dago Martinez
Глицериннің тері күтіміндегі пайдасы қандай?
Тамаша ылғалдандырғыш. Бұл молекула терідегі ылғалды сақтап қана қоймай, сыртқы ортадан да тарта алады. Сондықтан ол көбіне кремдер, сарысулар мен жууға арналған лосьондардың құрамына кіреді. Глицерин теріні жұмсақ, нәзік әрі серпімді етеді.
Агрессивті ингредиенттердің әсерін жұмсартады. Глицерин ретинол немесе қабыршақтандыратын қышқылдардың әсерін жеңілдетуге көмектеседі. Дерматологтар мұндай белсенді заттардан кейін теріні міндетті түрде ылғалдандыру керек екенін айтады — ал глицерин осы міндетті жақсы атқарады.
Қорғаныс қабатын қалпына келтіреді. Бұл компонент жасушалар мен липидтермен әрекеттесе отырып, терінің табиғи қорғаныс қабатын күшейтеді.
Глицерин кімге жарайды?
Мамандардың айтуынша, глицерол немесе глицерин кез келген тері типіне жарамды. Тіпті проблемалы терісі бар жандар да оны қолданудан қорықпауы керек, себебі ол тері саңылауларын бітемейді. Алайда кез келген компонент жеке ерекшеліктерге байланысты аллергия тудыруы мүмкін, сондықтан теріңіз глицеринге қалай әсер ететінін байқап көрген жөн.
Дәрігерлер болса глицериннің басқа белсенді заттармен тамаша үйлесетінін де атап өтеді. Сондықтан құрамында глицеринмен қатар С дәрумені, салицил немесе сүт қышқылы, азиялық центелла, пептидтер, пробиотиктер мен керамидтер бар өнімдерді еркін қолдануға болады.
Harper’s BAZAAR UK ұсынған мақаланың түпнұсқасын мына сілтеме арқылы оқи аласыз.
Автор. Мария Бурлака. Аударған. Қорлан Тұрсынбекова. Источник заглавного фото. Shutterstock. Автор. fotaro100. Фото. Пресс-офисы марок.
